பி.இ., பி.டெக். பொறியியல் படிப்புகளுக்கான கலந்தாய்வு - ஜூலை 2-ம் தேதி தொடக்கம்.

பி.இ., பி.டெக். பொறியியல் படிப்புகளுக்கான கலந்தாய்வு சென்னை அண்ணா பல்கலைக்கழகத்தில் வரும் ஜூலை 2-ம் தேதி தொடங்குகிறது.

எனினும் பி.இ., பி.டெக். படிப்புகளில் சேர விரும்பும் பொதுப் பிரிவு கலந்தாய்வு, வழக்கம்போல் எம்.பி.பி.எஸ். முதல்கட்ட கலந்தாய்வு ஜூலை 2-ம் தேதி தொடங்கி முடிந்த பிறகு, ஜூலை 9-ம் தேதி தொடங்கும் என எதிர்பார்க்கப்படுகிறது.

எம்.பி.பி.எஸ்.-பி.டி.எஸ். படிப்பில் மாணவர்களைச் சேர்க்க முதல் கட்ட கலந்தாய்வு வரும் ஜூலை 2-ம் தேதி தொடங்கும் என தமிழக அரசு அறிவித்துள்ளது.

கலந்தாய்வின் முதல் நாளான ஜூலை 2-ம் தேதி, எம்.பி.பி.எஸ்.-பி.டி.எஸ். படிப்பில் சேர விரும்பும் மாற்றுத் திறனாளிகள், விளையாட்டுப் பிரிவில் சிறந்து விளங்குவோர் உள்ளிட்ட சிறப்புப் பிரிவினருக்கான கலந்தாய்வு நடத்தப்படும்.

விளையாட்டுப் பிரிவில் சிறந்து விளங்கும் மாணவர்களுக்கு எம்.பி.பி.எஸ். படிப்பில் 3 இடங்கள் ஒதுக்கப்படுகிறது.

இந்த மூன்று விளையாட்டு இடங்களுக்கான மாணவர்களை அண்ணா பல்கலைக்கழக விளையாட்டுக் குழு தேர்வு செய்து அளிக்கும் நடைமுறை உள்ளது. எனவே எம்.பி.பி.எஸ். படிப்பில் சிறப்புப் பிரிவினருக்கான கலந்தாய்வு தொடங்கும் அதே ஜூலை 2-ம் தேதி, அண்ணா பல்கலைக்கழக பி.இ.-பி.டெக். சிறப்புப் பிரிவு மாணவர்களுக்கான கலந்தாய்வும் தொடங்குகிறது.

ஜூலை 3 முதல்...: தொழில் கல்வி மாணவர்களுக்கான பொறியியல் படிப்பு கலந்தாய்வு ஜூலை 3-ம் தேதி முதல் நடைபெறும்.

பொதுப் பிரிவு மாணவர்களுக்கான பொறியியல் படிப்பு கலந்தாய்வு ஜூலை 8-ம் தேதிக்குப் பிறகு தொடங்கும் என்று உயர் கல்வித் துறை வட்டாரங்கள் தெரிவித்தன.

கலந்தாய்வு தேதிகள் குறித்த அதிகாரப்பூர்வ அட்டவணை விரைவில் வெளியாகும் என்றும் அந்த வட்டாரங்கள் தெரிவித்தன.